Nieuws

Dit is óz prinsenpaar 2018

Prins Eric II is gebaore (en getaoge) oppe Graetheij op 19 mei 1969, ónger ’t sterrebeeld van Stier. Hae is de zoon van Jet en Math Salden, nei neet dae van die fitse. Eric haet nog eine awwere broor Roy, dae nao zien studie in Mestreech is blieve wone. Geduip es Eric Willem Elisabeth haet de Prins de kleuter-, de liëgere en de middelbare sjóal in Bor gevolg. Daonao verbreidde ziene waereld zich richting Zitterd wo hae op ’t Kleesj de havo en ‘t atheneum volgde. De deensplich reep en ózze Prins speelde tuba bie ‘t fanfarekorps der Genie in Vught op de Lunettekazerne. Nao zien vervolgstudie is hae gaon wirke bie Nedcar es transportplanner mer op-èns waor ‘t tied väör get anges en hae besjloot om opnuu de beuk in te gaon. Nao ein paar jaor liëre waor hae oetveurder. Volges de Prins is d’r niks sjóaner óm d’r ummer weer get sjóans van te make. 

Prinses Birgit is in ‘t ziekenhoes van Zitterd gebaore op 26 miërt 1969 ónger ‘t sterrebeeld van Ram, es dochter van Sybil en Jos van de Sjout. Twië maondj te vreug want stèl dich väör das se get mis in jaor wo de 1e edisie van PinkPop gehawte woort. Ze stuit bekènd in `t bevolkingsregister es Birgit Jaqueline Maria Josephina Schoutissen. Häör roets ligke in Beeg, waor ‘t neet dat opa Sjaak van de Sjout väör de leefde nao Obbeeg vertroch. De Prinses woonde, same mit häör jónger zösterke Esther in de Dörpstraot (noe Ecrevissestraot) in Obbeeg. Es hobbie sloog zie `t snaretrumke bie Drumband Concordia Obbeeg ónger leiding van Wilke Smits. Nao ‘t aafrónje van de havo, ’t atheneum en personeel en Arbeid wirk zie noe bienao 10 jaor es personeelkonzulent bie Stichting Óngerwies Midde-Limburg in Remunj. 

‘t Prinsepaar kènt zich al van augustus 1986 wo zie same oppe havo zaote, mèr op vastelaovesvriedig 27 fibberwarie 1987 sloog op ‘t sjolierebal ‘t vunkske äöver op de vinsterbank van Stadt Zitterd. Saoves zeen zie same nao ‘t Gabriëlbal gegange en dat doon zie nog ummer. Vanaaf häör twelfde is de Prinses in Beeg te vènje en haet ‘t dörpke häör hart gestaole. Gelökkig dach de Prins hie ‘t zelfde äöver. Els, Heintje en dikke Lies höbbe hun beer liëre drènke, Allemaol Kwatsj zörgde dat hun krejativiteit zich koos óntwikkele en mit de club van bie Gabby zeen zie jaore nao Werchter gegange. Noe zeen zie steunend lid van de Heemkunde Bicht in de houp dat tradisies blieve en gebroeke äövergedrage waere. 

Nao ein paar jaor wólle zie gaon same wone mer nao 22 hoeser bezoch te höbbe in Beeg koos te zie niks vènje (of betale) en zeen zie nóadgedwónge tiejelik oetgeweke nao Obbeeg. Op de 30e verjaordaag van de Prinses zeen zie in ‘t huweliksbuetje gestap óm 11 waeke later de gruetsje awwers te waere van zoon Ian. FF later vónje zie eindelik hun hoes in Beeg. Begin 2001 koos de ojevaar van Buurtvereniging de Maaskantj de gebaorte van zoon Yves aankondige en óm jaore later in 2007 väör de lèste kier in de tuin te staon biej de gebaorte van zoon Gie.

In hunne vriejen tied gaon zie gaer op vakansie get kultuur sjnoeve of lekker relekse in t zunke mit ein inlands beerke, ein wiekentje weg, ein hepke aete mit vrunj of op stap nao leuke evenemente in bènne- en boetelandj, en es in Beeg get los is, zeen zie ummer d’r bie. 
De Prins speelt al vanaaf zien 20e tuba bie ZH de Roepoepers mit es ein van de hóagtepunte ‘t jaorlikse oetstepke nao Grevenmacher. In zien jóng jaore is de Prins sterspeler van Armoeda 4 gewaes. Ein club vrunj die allein mer oet sterspelers bestóng. Noe is de Prins straotmuzikant bie käöninklikke Hermenie Aurora en bóks hae bie bóksclub Juxta Mosam in Stein. 

De Prinses haet gein sport-gen meer. In häör jóng jaore haet zie gevoetbald bie OVCS, Bor en Armada dames. Noe wanjelt zie allein of mit de Prins jederen daag. En besteit häör fitness programma wujer oet wasje, strieke en angere hoeshawelikke take. Op zaoterdigmörge zeen zie vaste supporter van Armada E1 wo Gie in voetbalt. De angere zoons zeen ouch vanaaf hun viefde lid geweas mer kènne ‘t noe neet mië kombinere mit sjóal en wirk. ‘t zelfde guldj jaomergenóg auch väör de hermenie en de drumband.

De leefde väör de vastelaovend is de Prinses mit de paplaepel ingegaeve. “esse de optoch neet löps, höbse geine vastelaovend” zag de mam ziëliger. Vanaaf häör gebaorte haet de prinses dan ouch de optoch gelaope, in Obbeeg mit ut Törp, in Bor mit Sjeng en de Króateköp, in Beeg mit Allemaol Kwatsj, later es ëinzelgänger en de lèste jaore es duo. Ouch de Prins is ummer derbie: in Zitterd löp hae al jaore de kènjeroptoch mit get muzikale vrunj, in Gelaen de gróate optoch mit de hermenie, in Beeg mit de vrunjegroep Dat is waal dudelik. Vanaaf de 11e van de 11e is `t vastelaovestied in `t Prinselik palies en kènt de Prinses eindelik häör ideje, die ‘t ganse jaor door de kop gaon, oetwirke en de boewteikeninge aan de Prins gaeve. Väör de Prins begint dan de meujlikke taak óm al dat gekrabbel óm te zètte en oet te veure. De Prins zelf begint pas op maondigmörge same mit zien vrunj te bedènke wie en wat ze gaon doon in d’n optoch. Tied zat!

De vastelaovend in Beeg en de Roepoepers zeen ram aan-ein gekoppeld. Al mië es 25 jaor bleus de Prins vriedes op ‘t Gabrielbal, op zaoterdig bezeuke de men op hunne vriejen aovend `t Bal van Daag en Nach, op zónjig organizere de Roepoepers ‘t Beegter Vastelaoves Konkoer, op maondig wurdt verdeild d’n optoch geloupe en op deensdig de muzikale aafsjloeting bie de Gawtrèkkers en es lèste Frenske verbrenne. ‘t motto van de Prins is …. Doe bès urges bie of neet, dus zörg das se niks mis.

Wilt g’r ‘t Prinselik paar ‘ns bezeuke dan zeet geer welkom op ’t Prinselik palies dat gelaege is aan de: Willem I Straot 18
6127BP in Beeg
tillefoon 046-4858648 
e-mail: saldomatik@home.nl

|Doorsturen






Ook hier adverteren?

Poll

Glanerbrook krijgt een miljoeneninjectie. De zwembaden in Sittard en Buchten moeten sluiten.

Deze poll is gesloten, u kunt niet meer stemmen.

Bekijk resultaten

Er is 569 keer gestemd.

Agenda

Weer